طريقتي بالعناية بالبشرة ... Skin care

السلام عليكم .. كيفكم و اخيرا رجعت و بعد فترة طويلة من التدوين 
تدوينة اليوم بتكون طريقتي بالعناية بالبشرة و المنتجات الي استخدمها و مرتاحه عليها 
وانتو عارفين البشرة تتغير من جو لجو فهذي المنتجات الي مرتاحه عليها بشرتي لهذي الفترة 

 

اول شي انا بشرتي مختلطة مائلة الى الدهنية و بشرتي معرضه للحبوب كل بين فترة و فترة
المنتجات الي استخدمها تادي الغرض الي ابيها و مناسبتني
*قبل لا ابدا حابه اقول الي يناسبني ممكن مايناسب غيري فهذي تجربتي انا * 

الوصف : غسول البشرة من لاروش بوزيه  مجموعة ايفاكلار طبي و مخصص للبشرة الدهنية و الحساسة و خالي من الصابون و الاصباغ و البرابين و مطهر للبشرة المعرضة للحبوب و البثور و الغبار
طريقة الاستخدام : ابلل وجهي مويه و احطه على وجهي فيه او استخدم جهاز اولاي
رأي فيه : مررره جميل الغسول ماينشف البشرة يوازن الدهون ماسبب لي تحسس ولا طلع لي حبوب استخدمه مرتين باليوم الحلو مايرغي كثير و اتحكم بالكمية الي ابغاها
..
الوصف : مقشر الوجه من نايتروجينا بالجريب فروت الوردي مخصص للبشرة الدهنية و مكافحة حب الشباب
طريقة الاستخدام : استخدمه بعد الغسول افرك وجهي بحركة دائرية من دقيقتين الى 3 دقائق و اغسل وجهي
رأي فيه : ناعم ما اذى بشرتي ما لاحظت عليه انه يعالج البثور السوداء ولا الحبوب ماينشف ويعطيك شعور الي وجهك تحسينه من الجفاف يتقشر يادي غرضه من ناحية ازالة الجلد الميت استخدمه مرتين بالاسبوع

الوصف : تونر كلارنس صمم خصيصا لاحتياجات البشرة الدهنية خالي من الكحول و يعمل على تطهير و شد المسام 
طريقة الاستخدام : احط شوي على قطن و امسح فيه وجهي بعد ازالة الميك اب او بعد غسل الوجه بالصباح 
رأي فيه : علبة اقتصادية تعليبة مخربه شي فتحته من فوق ما اشوفها عملية مايحرق البشرة ماله ريحه قوية يسكر المسام بعد ما استخدم ماسك مايترك اثر كنك حاطخ مويه لا على طول ييروح و مايبان له اثر  

الوصف : كريم مرطب الوجه من كلارنس يعمل على ترطيب البشرة من تاثيرات الجفاف اليومية و من الملوثات يروي البشرة و مستخلص من نبات عصري يعزز الاحتفاظ الرطوبة بالبشرة 
طريقة الاستخدام : احط بكمية مناسبة على الوجه و الرقبة بعد الغسول او الماسك 
رأي فيه : تحسين موية على بشرتك لانه قريب للجل و مايدبق تتشربه البشرة ما احس في طبقة دهنيه على الوجه  يرطب من قلب جدا جميل بالشتاء فالي بشرتها دهنيه و بالشتاء تنشف انصحها فيه و غير كذا مو اقتصادي 
..

الوصف : كريم مرطب العين من كيلز بالافكادو لترطيب منطقة حول العين قوامه ثقيل يعمل على الترطيب فقط يحتوي على فيتامين A و زيت الأفوكادو والأحماض الدهنية لترطيب الجلدطريقة الاستخدام : تخذي كمية بسيطه جدا و طبطبي حولين العين مو مسح لان الجلد الي حولين العين رقيق جدا  لاتكثري من كمية المنتج لان لو كثرتي بيبان معاكي كانو مزيت حولين العين 
راي فيه : جميل لترطيب و حتى لو استخدمته قبل الكونسيلر مايخطط معاي الكونسيلر و يعطي نظاره حولين العين 
*ملاحظه : ماركة كيلز مو متوفره بالرياض بس قريبا راح يفتحو بغرناطه بس انا وصيت اخوي عليه من ماليزيا  فالي محتاجته في بدبي و قطر و موقع نوردستروم او عند تاجرات *

الوصف : ماسك الطين من كيلز *عشقت هالماركه * منظف عميق للمسام يعمل على تنقية البشرة من الشوائب 
طريقة الاستخدام : اعرض وجهي لبخار عشان تكون مفتوحه المسامات و امده على وجهي و انظره ربع ساعه الي ما ينشف و اغسله بمويه باردة 
راي فيه : ماندمت اني شريته ابد علبة كبيرة و تكفي ينظف المسامات ينقي البشرة جدا سهل مده على البشره مايتعب بغسله مايسبب حساسيه ولا احمرار يعطي نظاره 
..

الوصف : ماسك الترطيب من كلارنس يعيد الى البشرة النضارة و الترطيب و الحيوية 
طريقة الاستخدام : احط منه كمية مناسبة على وجهي كني احط كريم عادي و انا و لما اقوم اغسل وجهي 
رأي فيه : مره حابة فكرة الماسكات الي انام فيه يعطي ترطيب مضاعف و نضاره و افكر اخذ منه الحجم الكبير ا
*استخدم الماسكات مرتين بالاسبوع *

وبكذا اكون خلصت التدوينه يارب تكونو استفدتو والي لها تجارب مع اي منتج من الي موجودين تقولي عنهم بالكومنت 
اشوفكم على صحة و خير بالتدوينة الجايه و شاكره لكم